Inuusuttut annersitsiniartartut

Immikkut ilisimasalittut inuusuttut annersaasartut aamma sulissuteriaannaavatit. Immaqamiuna annersaaniartartoq tassaasariaqaraluartoq pinngitsoornak attaveqarfissat, annersagaasimasoq pivallaarnagu. Taamaattumik pingaaruteqarpoq paasilaassallugu inuusuttut annersaasarnerat sumit aallaaveqarnersoq, aammalu qanoq iliuuseqarsinnaanersutit tamakku pillugit inuusuttoq oqaloqatigilerukku.

Anniartitsisartumik oqaloqateqarneq
Inummik annersaaniartartumik oqaloqateqarnermi paaraluni taassumap malinnaasinnaassusia toqqammavigalugu oqaloqatigiinneq ingerlanniarneqartariaqarpoq. Eqqaamasiuk annersaasarneq akuerineqarsinnaanngitsutut eqqartorsinnaagakku, inuttaa taamatut pinngikkaluarlugu. 

Inuusuttumik annersagaasimasumik oqaloqatiginninnertulli matumani oqaloqatigiinnermi ersarissumik maligassiaqanngilaq. Oqaloqatigiinnerit tamarmik immikkuullarissuupput, taamaattumillu pingaaruteqarpoq maluginiassallugu qanoq inuusuttoq oqariartuuteqarnersoq.

Matuma ataani siunnersorneqarsinnaavutit oqaloqatiginninneq illit tunginnit qanoq ingerlanneqarsinnaanersoq.

Arlaatigut annersitsinissaminut siunertaqarsimassooq
Inuusuttumik taamaattumik oqaloqateqarneq inimi marluinnaallusi ingerlattariaqarparsi. Taamaasiornikkut qulangersimaneqarani unnerluutigineqaranilu oqaloqateqarnini misigisaqarfigissammagu. Eqqaamajuk anniartitsisimanerminut pissutissaqarsimassammat. Annersaaniartartut annersitsinissaq qanigisarisarpaat, tassami allatut qanoq iliussallutik nalusaramikku. Annersitsisarnerat assigiinngitsutigut misigissutsikkut kamaqarnermit, uumitsassimaarnermit paatsiveerusimaarnermilluunniit pissuteqarsimasinnaavoq. Imaassinnaavoq aamma taamatut annersaasoqartarnera angerlarsimaffimmini ilikkarsimagaa aporaannerit annersaanermik kinguneqartinneqartartut.

Inuusuttoq tusarnaaruk 
Annersaasarneq akuerineqarsinnaannginneraruk inuttaa inuttut saassutinngikkaluarlugu. Taamatut ersersitsiniarsinnaavutit pineqartup tusarnaarneratigut, sooq taamatut pisoqarsimaneranik nassuiaateqarneratigut, aammalu paasiniarlugu misigissuttitigut qanoq inissisimanersoq. Illit oqariartuutigisinnaavat paasisinnaalluarlugu taamatut kamassarlunilu paatsiveerusimaarsimammat. Inuusuttummi taamaaqqajaasarput kisiannili annersaaneq aqqutissaanngilaq. Eqqaamajuk pisimasut pillugit paasinninneq qanorlu pissusilersorluni aaqqiiniarneq imminnut assigiinngissuteqarmata. Annersaaneq taamatut isiortup akisussaaffigiuarmagu. Annersaaneq immaqa nassuiaatissaqarpoq kisiannili illersorneqarsinnaanani. Ilisimajuk takusimanngisatit pillugit qularnaatsumik ilisimasaqarfiginnginnakkit. Taamaattumik mianersorit inuusuttoq anniartitsisimasutut pisuutinniarukku. Inuusuttoq oqaloqatigiuk qanoq misigisimalluni aappassiaqarnini misigisimaffigisarneraa. 

Nakuusersimanini qanoq misigisaqarfigisimavaa?
Annersaaniartartut ilaasa toqqaannartumik ersersinniartarpaat ”aappassiara taamatut qinngasaarinnissimanngikkaluarpat taamatut pisoqarsimanavianngikkaluarmat". Tamatumani aamma pingaaruteqarpoq inuusuttup kamassaqarnermini patsiginiagai paasilluarnissaat – iliuuseqaatigisimasaa pivallaarnagu. 

Inuusuttup misigisimappagu tusaaniarneqarluni, tamatuma kingunerisaanik periarfissaqalissooq pisimasut aammalu annersaasarnerup qanoq sunniuteqarsimanera oqaloqatiginnissutigissallugu. Tassami aamma tassunga kissaatiginanngikkaluarmat taamatut qisuariarsimanissaa. Inuit ikittuararsuit inoqatertik imaluunniit asasartik anniartissallugu ajoqusissalluguluunniit kissaatigisarpaat. Maluginiarsinnaasimaguku inuusuttup naaperiarneqarnilu paaserusunneqartoq, taava taassumap suut pingaartitarinerai apeqqutigisinnaavatit: Qanoq aappassiaalluarnermut tunngatillugu isumaqarpit, imaluunnit qanoq iliorlutit tamanna anguniarsinnaaviuk?

Ammasumik pissuseqarit

Inuusuttumik oqaloqateqarninni ilisimasatit kisiat aallaavigalugit oqaloqatiginninneq ingerlaguk ammaniarlutillu. Arlaatigut toraagaqarnikuusimaguit inuusuttumik kamassaqartorujussuarmik aammalu aapparisaminut suaartartumik, tamanna eqqaasinnaavat oqaloqatigisallu aperalugu, aamma taasumap misilittagaqarfigineraa arlaanik qisuariaateqartoorluni, kingorna nammineq uggorilersimasaminik. Aamma ajornartorsiut tamaat isigalugulusooq inissisimasinnaavutit, oqaluttuaralugulu misilittagaqarfigigakku ilisimaaralugulu inuit kamassaqartut arlaatigut iliuuseqaatigisimasatik kingorna uggorilersoortaraat.

Ersarissumik toqqaannartumillu oqalugit. Ersarluttumik nangaarpaluttumillu tunngavilersuutit toqqissisimatitsilerneq ajorput. Ammasumik oqaatigiuk sooq taamatut aperinerlutit:

  • “ Taamatut aperivunga nalunnginnakku ikiortissarnut innersuussinnaallutit”.
  • “ Taamatut aperivakkit imaassinnaammat pisimasut eqqartorutsigit ilinnut oqiliallaataassasoq”.

Annersaasartunik ikiuinniffissat
Nunatsinni inuussutissarsiutigalugu ikiuinnissinnaassunik suli peqanngilagut tamatumani annersaasartunut tunngatillugu. Inuusuttut ilinniagaqarnerminnut atatillugu tarnip pissusaannut oqaloqatiginninnissamut 8 timinik periarfissinneqarsinnaasarput. Tamanna annersaaniartartut ilaannut aamma periarfissatsialaavoq. Aamma kommunit neqeroorutigisinnaavaat ikorfartuillutillu siunnersuisinnaanissaq. Arlaatigut annersaasarsimaneq aalaakkaallunilu ulorianartuusimappat eqqaamasiuk nalunaaruteqarnissamut pisussaaffeqarassi.