Killissarititat pillugit inuusuttut oqaloqatigikkit

Killissarititat pillugit inuusuttut ilinniartikkit 
Aappassiariit akornanni anniartittarnerit pinaveersaartinniaraani tamatumani pingaaruteqarpoq inuusuttut timiminnik paasinnilluarnissaat killissarititat ilanngullugit. Angajoqqaat immikkullu ilinniarsimasut sulissutigisinnaavaat angerlarsimaffinni, atuarfimmi, sukisaarsaartarfimmi assigisaanilu timimut atoqatigiittarnermullu tunngatillugit killissarititat sumiinnerinik ilisimaarinnillualernissaat. Pingaaruteqarpoq inuusuttunut ilinniartitsissutigissallugu namminerisamik inuusuttoqatimillu killissarititaat ataqqisariaqaraat.
 
Inuusuttut killissarititat pillugit oqaloqatigikkit 
"Qanoq ilillunga uanga killissarititakka naqissusiivigissavakka?" Apeqqut tamanna inuusuttumut ingammik anniartitsisartumik aappaqartumut apeqqutigissallugu akiuminaatsinneqarsinnaavoq, inuusuttorpassuimmi killilimmik misilittagaqartarput taamaattumillu aappariinnermi suut naleqartinneqassanersut aamma paasiuminaatsissinnaasarlugit. Immikkut ilisimasalittut inuusuttut periarfissittariaqarpatit aappassiariinnermi suut naleqartinneqartariaqarnersut pillugit.
 
Inuusuttut imminnut puigornaveersaartariaqarput 
Ilisimatuussutsikkut misissuinerit takutippaat inuusuttut pingaartikkaat nammineq killissaritinniakkat pillugit paasisaqarnerunissartik, aamma allanut killiliisinnaanissaq eqqarsaatigalugu. Immikkut ilinniarsimasutut tamanna nalilersuiffigineqarnissaa sulissutigisinnaavat. Inuusuttut oqaloqatigikkit naleqartitat suut taakkua pingaartinnerai, akisussaassuseqartumillu ingerlaneq qanoq paasineqarsinnaanersoq. Akisussaassuseqarnermi aamma imminut paarilluarnermiillunilu ilorrisimaarnermiissimanerpa?
 
Angajoqqaat akisussaaffii 
Angajoqqaat erseqqissaassutigisinnaavaat inuusuttut oqaluttuarisassagaat, kikkulluunniit – aamma ilaqutariinni ikinngutiginerpaasaniluunniit inissisimasimagaluarpat – arlaatigut pissusilersornermigut killissarititat qaangersimagai. Angajoqqaat ilaannut annersaasarnerit inoqatimillu innimiilliornerit oqaluuseriuminaatsinneqarsinnaasarput. Taamaattumik arlaatigut oqaluuseriniaraanni qanoq pitsaanerpaanersoq oqaatigiuminaappoq. Pingaarnerpaarlu uaniippoq inuusuttut misigisimassasut angajoqqaat tatiginartuusut aammalu tusarnaarusussuseqartut.