Oqaloqatiginninnissamut siunnersuutit pitsaasut

Tamakkiisumik anngigisaqanngissuseq neqeroorutiginngisaannaruk, oqaloqatigiinnermi tikinneqarsinnaammat suliamik ingerlatitseqqinnissat

Oqaloqatiginninnissamut siunnersuutit pitsaasut
Ajornakusoornarsinnaavoq asaqatigiit akornanni persuttaasarneq pillugu oqaloqatigiinnissamik aallartitsinissaq. Eqqaamajulli ataasiaannarluniluunniit aperinissaq aperinngitsoornermit pitsaanerummat, aperiguimmi inuusuttumut isumassuinerit ersersissagakku.

Inuusuttut ilaannut oqilisaataasorujussuusarpoq ajornartorsiutip oqaluuserineqarnera. Immaqa ilaat aatsaat saaffiginninnerpit kinguningaatsiaagut qisuariartarput. Tamatigut pingaarnerpaasarpoq inuusuttoq aalajangiisuutittaraanni. Eqqaamajuk asattuussineq, tatiginninneq naammagittarnerlu oqaloqatigiinnermut inuusuttumut attuisumik ammaassisuusarmata.

Persuttaasarneq akuerineqanngisaannarpoq
Inuusuttut namminneq oqaluttuarigajunngilaat persuttarneqarsimanertik. Kanngusunneq patsisaasinnaavoq aamma qularutigisinnaavaat qanoq annertutigisumik namminneq persuttaanermut pissutaanertik. Ilisimasalittut pingaartuuvoq erseqqissassagukku persuttaaneq immaqa nassuiarneqarsinnaasoq, persuttaanerli illersorneqanngisaannartuusoq - aamma inuusuttoq persuttaaneqanngitsumik inuuneqartussaasoq.

Ataasiakkaanik oqaloqateqartarneq
Inuusuttumik immaqa persuttagaasimasumik oqaloqateqartarneq tamatigut inuusuttumut ataatsimut tunngassuteqartuuvoq. Oqaloqatigiinnerup qanoq aallartinneqarnissaa inuusuttup inissisimaneranut apeqqutaasariaqarpoq. Taamaattumik eqqortumik oqaloqatiginninnissamut najoqqutassaqanngilaq oqaloqatigiinnerup naammassineqarnissaanut.

Assigiinngitsorpassuarnik aperisoqarsinnaavoq. Paasiniariariaruk, inuusuttup qanoq akissuteqarnissaa qisuariarnissaalu. Apeqqutit ilaat tamanut tunngassuteqartarput taamaalillutillu inuusuttumut mianerinninnerullutik, inuusuttup persuttaaneq pillugu toqqaannartumik oqaluusererusunngisai.

Apeqqutit nalinginnaasut makkuusinnaapput:

  • Ulluinnarni qanoq ippit?
  • Asasarisallu qanoq ippisi?
  • Ernumarpasipputit/eqqissiveqarpasinngilatit/ajuusaarpasipputit – oqarfigerusussinnaavinga sooq?

Inuusuttoq takusannik oqaluttuarfigiuk, ernumarpasillutit: 

  • Takusinnaavara tilluusartutit/ soorlu annersimasutit. Tamanna pillugu oqaloqatigerusuppinga?
  • Paasisimavara, ikinngutigilluakkatit ilagivallaartanngikkitit pisarnertut. Tamanna pillugu oqaluttuusinnaavinga?

Apeqqutit allat ammanerusinnaapput atorneqarsinnaallutillu maluginiarukku inuusuttup ajornartorsiutini pillugit oqaloqatigerusukkaatit.

Apeqqutit allat makkuusinnaapput:

  • Asasat ilinnut sakkortusaartarsimava?
  • Asasat sangiattaqaa/ningartaqaa, qanorlu iliortarpa?
  • Asasavit festeriarnissannut inertersimavaatit, imaluunniit ikinngutit ilaquttatilluunniit ilageqqusimanngilai?
  • Asasat annilaangagiviuk?
  • Asasavit pinngitsaalillutit kujanniarsimavaatit imaluunniit kujanninnernut tunngasunik allanut perusunngisannut?
  • Asasavit sioorasaarsimavaatit imminut ajoqusernissaminut?

Sooq aperinersutit erseqqissuliuutigiuk:

  • Pitsaanerpaamik ikiorniarlutit qulaajaaniarlunga apererusuppakkit…
  • Assigiinngitsutigut ikiuinissamut periarfissaqarpoq, taamaattumillu apererusuppakkit…

Inuusuttumut siooaraasaarineq qulaajaruk

Inuusuttoq peqatigalugu qulaajarniarsariuk, pisoq qanoq ilungersunartiginersoq, aamma persuttaaneq ima ilungersunartigaaq, inuusuttoq aapparisamit piaarnerpaamik qimaguttariaqarluni.

Assersuutigalugu apeqqutit kina, suna, sumi atorsinnaavatit:

  • Kikkut sioorasaarinermut ilaappat?
  • Susoqarpa aamma qanoq annertutigisumik?
  • Qanoq sivisutigisumik ingerlava?
  • Inuusuttup kina/kikkut annilaangagai?
  • Inuusuttup suna/suut annilaangagai?