Sooruna ingerlalluanngitsut?

Sooruna ingerlalluanngitsut?
Sullissisutut pingaaruteqarpoq paasisimassallugu qanoq pisariusinnaatigimmat aappaqarluni anniartitsisartumik, aammalu qanoq inuusuttumut ajornartigisinnaatigimmat aappassiarisap qimanniarnissaa. Misigissutsit aqukkuminaassisoortarput silappaarissuserpullu tammakartarluni. 

Asannilerneq
Aappassiaqarneq inuusuttorpassuarnut misigisaavoq asannileqqaarfittut siullertut. Taamaattumik qimatsiniarnissaq ajornakusoorsinnaasarpoq, naak inuusuttup nammineq nalunngikkaluaraa aappassiariinnertik iluamik ingerlanngitsoq. Inuusuttummi misilittagaqarpallaanngillat, taamaattumillu nalileruminaatsittarlugu ilumut aappassiarisamik piumasaqaatai pissusilersuutaalu naapertuuttuunersut. Tassami anniartitsisarneq sioqqullugu asannileqqaarneq nuannaartorinninnerlu atugaaqqaartarmata. Piffissami siusinnerusumi misigissutsit sakkortusinnaasarput arlaatigut qanoq iliorfigiuminaassinnaasartut.

Ammut qummullu
Inuusuttup aappassiaqarnini qummut ammullu ingerlasartutut sakkortuumik misigisaqarfigisarpaa. Asannileqqaarnerlu imatut kinguneqartarluni qimatsinaveersaarnissaq salliutinneqalertarluni, tamatuma saniatigut qasutitaanerup nukissanik nungusaavigisarpaa taamaattumillu qimatsinissamut nukissaarutsittarlugu.

Matoqqaneq
Inuusuttup taamatut atugaqartup aamma siusinnerusukkut ikinngutigisani ilaquttaniluunniit sangiannerit pissutigalugit takussaaqqalersimasarpai. Taamaattumik aamma inuusuttup misigisimasinnaalertarlugu aappassiani kisiat qanigisarilersimallugu, taamaattoqarsimappalli aapparisani anniartitsisaraluartoq qimakkuminaatsilersinnaallugu.

Inuusuttup aamma nammineerluni ilaquttani ikinngutinilu alarniarsimasinnaasarpai. Tassunga pissutaasinnaavoq inuusuttup kanngusunneranik imaluunniit ajornartorsiutigisani pillugit toqqartaarfigineqarusunnginneranik. Akerlianik inuusuttup ikinngutigisai aamma tunuartersimasinnaasarput, tassami paasiuminaatsillugulu akuerisinnaannginnamikku sooq aappassiani qimakkusunnginneraa, aammalu kissaatigisannginnamikku aappassiarisaanut pisimasut pillugit avoqqaarliutigineqarsimasut uteqqinneqannginnissaat.

Misigissutsit allanngortarnerat
Amerlasuutigut aappassiaqatigiinnermi pisut allanngorarsinnaasarput anniartitsinermiit asanninnermik paaqqutarinnikkusunnermillu takutitsiviusarlutik. Inuusuttoq pineqartoq anniartinneqartaraluarluni nikassarneqartaraluarlunilu misigisarpaa aapparisani utoqqatsertoq, taamaasioqqissannginnerartoq saammaatseqqusorlu. Taamaattumik aappassiariinnerup kipitinniarnissaa ajornakusoorsinnaasarpoq, tassami inuusuttoq uppertinneqarsimasinnaasarami asaneqaleqqinnermiit pissutsit ilorraap tungaanut allanngorsinnaanissaanut.

Akisussaassuseqarneq
Imaassinnaavoq aappassiarisaq siornatigut atugarliornikuusimasartoq, soorlu ikiaroornartunik allanilluunniit oqimaatsorsiarilertakkaminik atugaqartarsimalluni. Taamaattumik aapparisaata nalligilersimasinnaasarpaa aammalu pakatsisillugu qimakkusunnagu. Inuusuttup sakkortuumik misigisimasinnaavaa aappassiarisaminik pakatsisitserusunnani, tassami tamakkuninnga misigisaqartareernikooqimmat. Taamaasilluni inuusuttup nammineq akigisutut inissittarpoq, ajunngitsumik pineqarnissani tunulliussinnaasarlugu.

Imminut tatiginnginneq
Inuusuttup sunnerneqaatigisimasinnaavaa aappassiarisami qanoq oqaluttuarlunilu naliliisimaneranik. Taamaattoqartillugu inuusuttup nammineq misigisimasani tunulliuttoorsinnaasarpai, apeqquserneqaatigilertarlugillu ilumut aappassiarisani ilumoornersoq, imaluunniit nammineq naapertuuttumik isummersorsimallunilu namminerlu pisuussutigisaminik  pissusilersornerlussimanerluni. Aamma tassani asannilersimaneq sunniuteqarsinnaasarpoq. Inuusuttup aappassiarisaminut qanillattortorujussuusimasinnaasarpoq, taamaattumillu aamma taasumap isumaannut nakkaannaqqajaasinnaasarluni. Taamaasilluni inuusuttup nammineq aqqusaarsimasani misigissutsinilu pillugit paatsiveerussimasinnaalluni.

Immikkoortinneqaleriartorneq
Inuusuttoq aamma imatut takorluuinnilersimasinnaasarpoq ajortumik pineqartut sanngiikkamik taamatut pineqarsimasarlutik, naak imminut tassunga inissikkusunngikkaluarluni. Anniartinneqartaraluarluni aappassiamik qimatserusunnginneq pisuusaarneruvoq pinngitsuusaarnertalik, tassami ajortut kiinnarsissallugit takorusukkunnaarneqartarmata. Tamatuma saniatigut inuusuttup pisooqataasutut misigisimanera kanngusunneralu sunniuteqaqataasinnaasarput, imminut ajoraluni taamak ingasatsigisumik pisoqarsimammat. Inuusuttummi ilaasa aappassiarisaminnut qimatserusunnginnermikkut imminut isumaqartilersinnaasarput, arlaatigut namminneq sanngiissuseqaramik akisussaaqataagamillu  tassaniiginnartariaqarlutik.

Angajoqqaanik kamanneq
Aappassiariinnerlunnerit ilaatigut ilisarnaatigisinnaasarpaat angajoqqaannit qimatsiniarnermi alloriarfiusutut isigisariaqartut. Imaassinnaavormi angajoqqaanut attaveqarnerluttarneq nutaajunngitsoq, taamaattumillu taakkunannga qimarratiginninnikkusulluni. Taamaattumik taakkunannga ikiortissarsiorniarsinnaaneq ajornakusuulertarpoq. Aamma imaassinnaavoq angajoqqaat pakatsisikkumanagit piumasaqaataasartunullu naamassinninnginnermik nalilerneqarsimasinnaasoq.