Sullissisutut inissisimaffik

Sullissisutut inissimaffik
Sullissisutut inissimanermi pingaaruteqarpoq inuusuttoq paasitinniassallugu taanna illersorniarlugu illit inissisimasuugavit. Inuusuttup pisariaqartippaa illit paasinnillutit pisut qanoq ittuulersimanerannik paasinnissuteqarsimassasutit. Tamakkumi aappassiariinnerni anniartitsiffiusartuni misigineqaqqajaasarmata. Illit inissisimanerit pingaaruteqartuuvoq aammalu inuusuttup iliuusissaanut aalajangiisuusinnaalluni. Imaassinnaavormi apeqqutit tunniussatit imaluunniit pissusilersuutit tassaasoq inuusuttumut aalajangiisuulluni malinniarneqartussanngortoq.

Oqaloqatigiinneq toqqissisimanartumik ingerlatinniarsarissavat. Tamatumani inassuteqaatit sisamat ukua niaqormiorisinnaavatit:

  • Pisimasut sakkortuut pillugit tusarnaarsinnaasariaqarputit misigissutsikkut eqqortinneqarpallaarnak.
  • Sapinngissuseqartariaqarpat inuusuttut sinnerlugit iliuuseqannginnissat, kisiannili namminneq qanoq iliuuseqarsinnaalernissaanut ikiuiniartoq.
  • Aappassiariit akornanni anniartitsisarnerit kingunerisartagaalu pillugit ilisimaarinnittuusariaqarputit. Ilisimasaqarfigisariaqarpat, inuusuttoq sumi ikiortissarsiorsinnaassanersoq.
  • Oqaluttuarsinnaaneq pingaaruteqartuuvoq. Tassuunatigut inuusuttup takusinnaavaa pisimasut qanoq ittuunerinik, taamaattumillu pisimasut aamma allanut oqaluttuarisinnaalissallugit.  

Tatiginassuseqarit eqqissititsillutillu

  • Eqqissisimagit, tusarniaasarit naammagittarlutillu, aamma inuusuttoq oqaluttuartiguk nammineq malinnaasinnaanissaa aallaavigalugu.
  • Inuusuttoq tapersersoruk isiginnittariaasii pillugit aamma nalornissutai paasiniarlugit.
  • Inuusuttoq nukittorsaruk uppernarsillugulu aappassiariinnerat pissusissamisut ingerlasimannginnera pillugu.
  • Inuusuttoq misigitillugulu eqqarsarluartiguk.

Imminut pisuutinneq qisuariarnerusarpoq nalinginnaasoq. Inuusuttoq oqaluussinnaavat qisuariaatit misigissutsillu nalinginnaasuummata, akerlianilli anniartitsisarneq akuerineqarsinnaanngimmat. Tamatumani oqaluttuarissallugu pissusissamisoorsinnaavoq allat illit taamatut misigisaqartarsimasut oqaluunnikooreersimagakkit. Taamaasioruit immaqa inuusuttoq kisimiittutut misigisimajunnaarsinnaassaaq.

Periarfissaq una eqqaamajuk inuusuttoq aappassiaminik qimatserusunngissinnaammat tassunga asanninnini pissutigalugu. Pingaaruteqarpoq sullissisutut inissaqartitsissagavit/akuersissagavit, aammalu inuusuttut qinerseriaasiat avoqqaarliutigissannginnakku. Pineqartup aappassiani asanartorujussuartut isigisilersimappagu inuusuttoq oqaluttuussinnaavat asannittoq qanoq pissusilersortussaagaluarnersoq, aammalu aappassiarisaq ilumut piumasaqaatinik tamakkuninnga naamassinnissinnaanersoq. Amerlasuunut aappassiarisaq siulleq tassaasarpoq aappaqaleqqaarfik, taamaatumillu inuusuttup misilittagaqarpiannginnera aallaavigalugu oqaluttuarissallugu aappariilluarneq qanoq isikkoqartariaqaraluarnersoq.

Anniartitsisarneq ingalallugu
Inuusuttoq nukissaqarpasinngippat aappassiarisani qimanniassallugu, paasiniarsinnaavat inuusuttoq allami qasuerserallarusunnginnersoq, piffissami aggersumi aappassiarisani qimaqqalaarlugu. Soorlu immaqa efterskolerusunnginnersoq imaluunniit ilinniakkamik aallartitsilluni. Ingalassimanninneq imatut kinguneqarsinnaavoq inuusuttup nukissanik nassaarnermigut aappassiarisani qimassinnaaleraa.