Alliaq

Nakuusertartunut katsorsaaneq

Alliaq angutinut arnanullu aapparisaminnut persuttaasarnermik saassussisarnermillu ajornartorsiuteqartunut neqeroorutaavoq.

Ole Brandtip oqaluttualiaa piniartoq Qooqa inuiaqatigiinni sinngasarnermik persuttaasarnermillu akiuerusuttoq tunngavigalugu Alliaq taaguusiunneqarpoq. Qooqa aanaaminit Alliamit isumassuisuusumit silatuujusumillu siunnersorneqarpoq, aanaavata paasitippaa persuttaaneq iluaqutaanani akerlianik ajornartorsiutinik amerlanerusunik persuttaanerulernermillu pilersitsisartoq.

Aappaasut aappaminnut persuttaasartut nalinginnaasumik eqqissisimasumik asannittumillu aappariinnissamik kissaateqartarput. Kisianni eqqarsaqqaarani periataartarnerit kamattarnerillu aqunnissaat ajornartorsiutigisarpaat. Amerlanertigut persuttaasarneq meeqqanut ajoqutaasoq ilisimasarpaat, tamannalu qanigisanut persuttaasarnerup unitsinnissaanut kissaammut kajumissaarisuusarpoq.

Alliami katsorsaasarnerup siunertaa tassaavoq, nakuusertartut persuttaasarnertik nassuerutiginissaat, nakuusernerullu tungaatigut akisussaaffeqalernissaa aammalu aappaminnut persuttaasarnerup unitsissinnaanissaanut ilinniarneq. Neqeroorut tarnip pissusaanik ilisimasalimmik arnanut angutinullu oqaloqateqarnermik, pisariaqartitaannik naleqqussakkanik imaqarpoq.

Inuit ataasiakkaarlugit oqaloqatigineqartassapput aallaaviatigullu nal. ak. arfineq pingasut sivisussuseqartassalluni.

Oqaloqatiginninnissamut aamma ilaatinneqarpoq aapparisap nal. ak. marluk oqaloqatigineqarnissaanik neqeroorut.

Katsorsarneqassaguit minnerpaamik 15-inik ukioqalereersimassaatit. Katsorsagassat 18-it inorlugit ukiullit kommunimiit innersuunneqassapput, angajoqqaatut oqartussaassusillit inuusuttorlu katsorsagassaq allakkatigut akuersissuteqassapput.

Neqeroorut pillugu www.alliaq.gl-imi annertunerusumik atuarit