Ilaqutariinni persuttaasarneq

Ilaqutariinni persuttaasarneq timikkut tarnikkullu persuttaanermut taaguutaavoq uku akornanni:

  • Ilaquttani
  • Inooqatigisat inooqatigisimasallu
  • Meeqqat angajoqqaallu 

Taaguut suiaassutsimut attuumassuteqanngilaq, arnalli angutinit amerlanerpaartaat angerlarsimaffinni persuttagaasarput. Sulisutut immaqa taaguut ´qanigisani persuttaasarneq' aamma naammattoortarsimassavat taamatut isumaqartoq.

Quppernermi uani aalajangersimasumik suliaqartuusutut persuttaanerit suussusii naammattoorsinnasatit ilisimasaqarfigilissavatit aammalu persuttaanerup angutinut, arnanut, meeqqanut inuusuttunullu kingunerisartagai ilisimasaqarfigilissallugit.

Persuttaaneq sunaava?
Persuttaaneq tassaavoq; siunertaa apeqqutaatinnagu inuup allap innarligassaanngissusianik akornusiisoq imaluunniit ersilersitsisoq, anniartitsisoq inummilluunniit akornusiisoq – apeqqutaatinnagu inuk meeraagaluarpat inersimasuugaluarpalluunniit.

Meeqqat angerlarsimaffimmi persuttaaviusumi inuusut tarnikkut ikeqalersarput. Persuttaanerup meeqqap ineriartornera peqqissusialu navianartorsiortilersarpaat.

Meeqqat persutagaasimasut persuttaanermilluunniit isiginnittuusimasut soorlu anaanaminnut, timikkut tarnikkullu akornuserneqartarput inersimasunngornermut atagajuttartunik. Pingaartumik ajoqusiisoqartarpoq persuttaaneq angerlarsimaffimmi pisimappat – angerlarsimaffik isumannaatsuusussaasoq peroriartornermilu toqqissisimanartussaasuusoq.

Meerarpassuit pisinnaatitaaffitsik ilisimanngilaat ilisimanagulu akueriuminaatsuusoq angajoqqaat imminnut meeqqaminnilluunniit persuttaagaangata.

15-it 16-illu akornanni ukiullit 38 procentiisa anaanartik persuttarneqartoq siumorsimavaat. 7 procentiisa ataatartik persuttarneqartoq siumorsimavaat, 10 procentiisalu qatanngutertik persuttarneqartoq siumorsimallugu.