Persuttaanerup kinguneri

Suliffimmik paarsinissamut angajoqqaatulluunniit inissisimanissamut ajornartorsiutit persuttaanerup kingunerisinnaasaasa ilagaat.

Persuttaanerup kingunerisai timikkut, tarnikkut, inooqatigiinnikkut, aningaasaqarnikkut piviusunillu ersiutaasinnaapput. Inuit ataasiakkaat persuttaanermik misigisimasaat malillugit assigiinngisitaartuusinnaapput aamma qanoq malunniuttarneri ersiuteqartarnersut malillugit.

Inuit persuttarneqarsimasut nalinginnaasumik ilisarnaataat:

  • Nanertisimaneq annilaanganerlu
  • Kingunerlutsitsineq, aamma taaneqarsinnaasoq Post Traumatisk Stress Syndromimik (PTSD)
  • Sinnarlunneq eqqaamajuminaatitsinerlu
  • Piffissamik paatsiveeruttoortarneq
  • Paatsiveerutianeq, uumisukujunneq ukkassilluarsinnaannginnerlu
  • Aalajangiinissamik ajornartorsiuteqarneq
  • Imminut pisuutinneq aamma imminut tatigerpiannginneq

Pissusilersornermik kinguneqartitsinermut assersuutit:

  • Atornerluineq
  • Imminut mattunneq
  • Inuunermi allaanguutimininnguanut sakkortuumik qisuariartarneq

Sulineq ilaqutariinnerlu
Aamma kingunerisinnaavai inuup ulluinnarni inuunini sapileraa siornatigumut sanilliullugu. Soorlu angajoqqaatut iliuuseqarnissaq pitsaavallaanngitsoq tamatuma meeqqat sunnertaraat.

Kingunerisinnaasat allat tassaapput suliffimmik paarsilluarsinnaajunnaarneq immaqalu aamma suliunnaavinneq.

Persuttaanerup meeqqanut kingunerisai
Meeqqat ineriartornerannut sunniuteqartarpoq tarnikkut, timikkut kinguaasiutitigullu persuttaaneq ulluinnarni inuunermut ilaappata – piffissap sivikitsup iluani siunissamiluunniit.

Atuakkit meeqqanik persuttaanerup ilisarnaatai kingunerisaallu, ilisimasalittut maluginiartariaqakkatit.