Meeqqat inuusuttuaqqallu pillugit inatsisit

Meeqqat inuusuttuaqqallu pillugit Inatsisit
Isumaginninnikkut siunnersortitut, peqqissaasutut ikiortitut, nakorsatut, ilinniartitsisutut, tarnip pissusaanik nakorsatut, perorsaasutut il.il. pisussaaffeqarput maluginiagaqaruit qanoq iliuuseqarnissamut. Tamatumani pineqarpoq paasisimagukku meeraq anniartinneqartarluniluunniit atoqatigiinnikkut innimitsaattuliorfigineqarsimasoq. Inatsisitigut toqqammavigassaq tassaavoq: Meeqqanik inuusuttuaqqanillu ikiorsiisarneq pillugu Inatsisartut peqqussutaat nr. 1, 15. april 2003-meersumi § 5 imm. 2.

Tamatumani kommuni ilisimatinneqaruni naliliisussaatitaavoq ilumut pisariaqarnersoq arlaatigut ikiorsiinissaq siunertaralugu pisariaqartitsisoqarnersoq, tamatumali nassatarisaannik meeqqanik inuusuttuaqqanillu ikiorsiisarneq pillugu Inatsisartut Peqqussutaat nr. 1, 15. april 2003-meersoq toqqammavigalugu meeraq pineqartoq angerlarsimaffiup avataannut inissiisoqartariaqarnersoq.

Pisortaqarfinni sulisuusut sulinermikkut meeqqap atugarisai pillugit ilisimasaqarfigilersimasatik toqqammavigalugit isertortumik kommunimi oqartussanut ingerlatitseqqissinnaapput – takusigit Suliassat ingerlatinneqatarnerannut Inatsimmi kap. 8-mi allaqqasut.

Ilisimasanik ingerlatitseqqittussaatitaanermut maleruagassat pillugit paasiniaagit

Angajoqqaatut oqartussaassuseqarneq pillugu inatsimmi § 2, imm. 2-mi allaqqavoq ”Meeraq isumassorneqarnissamut aamma toqqissisimanissamut pisinnaatitaaffeqarpoq. Inuttut ataqqineqassaaq aammalu timimigut annersarneqarluni pillarneqassanani allatulluunniit kanngunarsagaassanani."

Meeqqat perorsarneqarnerannut atatillugu meeqqanik annersaaneq taamaalilluni inerteqqutaavoq.

Meeqqanik annersaasoqarsimatillugu alaallit Nunaanni Pinerluttulerinermut Inatsimmi § 88 naapertorlugu pineqaatissinneqarnikut inissiisarfiannut pineqaatissiisoqarsinnaavoq.

Qanoq FN-ip meeqqat pisinnaatitaaffii pillugit aalajangersagaqarpa?