Imminut paarigit suleqatitillu paaralugit

Sakkortuumik misigisaqarsimasunik sullissinermit kingunerlutitsineq

Video siulleq: Inunnik ajunaarnermik eqqugaasimasunik/inuunermi sakkortuumik misigisaqarsimasunik sullissinermi nukissaaruttarnerup sakkortuumillu  misigisaqarsimasunik sullissinermi kingunerlutsitsisarnerup ersiutaanik ilisimaarinninnissaq pingaaruteqarpoq

Uani videomi taaguut sakkortuumik misigisaqarsimasunit sullissinermit kingunerlutitsisarneq ilisaritinneqarpoq, taamaalisimanermilu ersiutinik ilisarinnissinnaanerup pingaaruteqarnera ersersinneqarluni, kiisalu illit ilinniarsimasutut imminut paarinissannut qanoq iliuuseqarsinnaanerit ersersinneqarluni

Inuit ilinniarsimasut persuttarneqarsimasunik aamma nalinginnaasumik ajoqusernermik kingunerlutsisisunik sullissisut, taakkulu oqaluttuartassaannut piffissarujussuarmik atuillutik tusarnaartartut tupinnanngitsumik taakkuninnga sunnertittarput. Inuit ilinniarsimasut ulluinnarni misilittakkamik suliarinissaat pillugit pisariaqartitaminnik ikiorneqanngikkunik, ilaannut kingunerluttarpoq, sullitamik misigisimasaannut assingusunik annilaanganermik uippakajaarnermillu misigisaqalersinnaagamik. Tamatumalu kingunerisinnaavaa nukissaaruttarneq ajornerpaaffianilu sakkortuumik misigisaqarsimasunit sullissinermit kingunerlutitsineq. Taakkulu tamarmik inunni ilinniarsimasuni sakkortuunik misigisaqarsimasunik sullissisuni nalinginnaapput.

Suliat uagut ilinniarsimasutut ulluinnarni sulinitsinni naapittakkatta inuttut inuunitsinni sunnertarpaatigut. Tamannalu pissutigalugu ulluinnarni sulinitsinni immitsinnut suleqatigiittullu paareqatigiinnissatta sallinngortinnissaata pingaartinnissaa pingaaruteqarpoq. Taamatuttaaq pingaaruteqarpoq uagut ilinniarsimasutut, suliami uani suliaqartutut suliap inuttut immikkut ittunik uagutsinnit piumasaqaateqartarnera nassuerutigissagatsigu.

Video 1 uani takuuk

 

Suleqatigiittut oqaloqatigiinneq

Video-t aappaat: Suleqatigiittut oqaloqatigiinneq

Nalaataqarnerlussimasunik sullissigaanni nukissaaruttarneq sakkortuumillu misigisaqarsimasunik sullissinermit kingunerlutitsinissamik allanik suliaqartunit naleqqiullugu annertunerusumik eqqugaanissatsinnut navianartorsiorpugut. Pingaaruteqarpoq illit ilinniarsimasutut ilinnut suleqatinnullu tapersersuisinnaanissannut piareersarsimanissat, suliassassinnilu ataatsimoorlusi akisussaaffeqarnissassi qulakkeernissaanut ikiuussinnaanissat. Uagummi ilinniarsimasutut taamaallaat allanik isumaginnissinnaavugut, immitsinnut paarinissarput eqqaamasinnaagutsigu. 

Misigisat artornartut suliarinissaannut illit ilinniarsimasutit ilinnut suleqativillu ikiornissaannut aamma ataatsimoorlusi akisussaaffeqaqatigiinnissi qulakkeernissaanut  arlalinnik iliuuseqarsinnaavutit. Uani videomi Suleqatigiit ajoqutinngorsinnaasut pinaveersaartinniarlugit oqaloqatigiinneranik taaneqartartoq ilisaritinneqarpoq, taannalu nukissaarunnissap sakkortuumillu misigisaqarsimasunik sullissinermit kingunerlutitsinissap iluarsiiffiginissaanut periusiuvoq misilittagaqarfigineqarlualereersoq. Tassani pingaartinneqarpoq misigisimasat artornartut ammasumik tusarnaarlunilu oqaluuserissallugit, tassanilu pisumi suut ingerlalluarsimaneri isiginiarneqassallutik. Videomi nalinginnaasumik oqaloqatigiinneriaatsit oqaluttuarpalaartumillu periuseqarnissaq nassuiaatigineqarpoq, suleqatigiit pitsaasumik kinguneqarluartumillu ajoqutinngorsinnaasut pinaveersaartinniarlugit oqaloqatigiissappata.

Video 2 uani takuuk

 

Ataatsimeersuarnertut periuseq

Video-t pingajuat:  Ataatsimeersuarnertut periuseq

Qimarnguimmi imaluunniit inunnik nalinginnaasumik ajornartorsiortunik sullissiguit pingaaruteqarpoq, suliamik suleqatigiit akisussaasuusut, oqartussaasoqarfiit assigiinngitsunik suliallit akornanni aamma tamakkiisumik isiginnilluni sulianik pineqartunik naliliinissaat. Arnamut pineqartumut imaluunniit meeqqamut ukkanneqartumut pitsaanerpaamik aaqqiissutaasinnaasumik nassaarniarnermi siammasissumik tunngavilimmik suleqatiginnissamut sulinermilu suliamut tunngassutilinnik isummersoqatigiinnissaq pisariaqarpoq.

Periuseq ataaseq atorneqarsinnaasoq unaavoq isumaliutiginnilluni periuseq Ataatsimeersuarnertut periutsimik taagorneqartoq. Uani suliamik suleqatigiit sulinerminnut tunngasunik sammisassanik oqallissinnaapput suleqatigiinnillu tamarmiusunit aaqqissuusaasumik utertitsiffigineqarsinnaallutik.

Periutsip oqallinnermi suliamut isiginnittariaatsit siammasissumik tunngaveqarnissaat qulakkiissavaa, taamaaliornikkut isumaginninnermi siunnersortit, perorsaasut aamma tarnip pissusiinik ilisimasallit immikkut ilisimasaminnik tapersiisinnaanissaminnut periarfissaqassapput. Tamatuma saniatigut periutsip aamma qulakkiissavaa, suleqatigiinni ataatsimoortumik akisussaaqatigiinnermik pilersitsineq, tamatumalu kingunerissavaa sulisup persuttarneqarsimasunik sullissinermini eqqissisimanissaa aammalu suliani aalajangersimasuni kiserliortutut misiginnginnissaa. Tamatuma saniatigut pisortaq taamatuttaaq qimarnguimmi sulianik ingerlasunik malinnaanissaminut periarfissaqalissaaq aamma suliami aalajangersimasumi ataatsimi assersuutigalugu pisortaniit immikkut eqqumaffigisassaqarnersoq malinnaaffigisinnaalissallugu.

Video 3 uani takuuk