Meeqqanut persuttaasarneq

Meeqqanut persuttaasarnerit assigiinngitsorpassuusinnaapput, aamma meeqqanut ataasiakkaanut persuttaasarnernut assigiinngitsunik taputartuusineq pineqarsinnaavoq. Timikkut persuttaanerusinnaavoq, tarnikkut persuttaanerusinnaavoq kinguaassiutitigulluunniit atornerluinerusinnaalluni.

Ullumikkut nalunngilarput ilaqutariinni persuttaanermik misigisaqarneq meeqqanut kingunerlutsitsisinnaatigisoq, soorlu nammineq persuttarneqartutut misigisimanartarluni. Persuttaanerit suulluunniit meeqqanut annertuumik sunniuteqartarput. Taamaattumik meeqqat angajoqqaavilu ikiorneqartussaapput peqqinnarnerusumik inooqatigiilernissaannut aamma persuttaanermit misigisimasaminnik suliarinninnissamut ikiorneqartussaapput.

Timikkut persuttaaneq
Timikkut persuttaaneq anaasinerusinnaavoq, isimmitsinerusinnaavoq, issuttuusinerusinnaavoq, cigaritsinik uutsitsinerusinnaavoq imaluunniit toqunartortitseriarnerusinnaavoq. Persuttaanerup meeraq timikkut akornusersinnaavaa, soorlu saarnganik napisisinnaalluni tilluusartitsilluniluunniit. Meeraaqqat qaratsamikkut akornuteqalersinnaapput tappiillisinnaallutillu issuttuuneqarunik, ajornerpaamillu innarligaanertik toqqutigisinnaallugu.

Angajoqqaat akornanni timikkut persuttaasarneq meeqqamut namminermut persuttaanertut sunniuteqartarpoq. Meeqqap soorlu angajoqqaat arlaasa persuttarneqarnerat tusaasinnaavaa, ersiungaarnerlu misigilissavaat, isumaqalerlutillu angajoqqaat arlaasa aappani toqussagaa.

Tarnikkut persuttaasarneq
Tarnikkut persuttaaneq meeqqap timikkut pillarneqarnissaanik sioorasaarinerutiginninneratigut pilersinnaavoq. Meeraq soorlu utikajaartumik timikkut persuttarneqarnissamik sioorasaarneqarsinnaavoq mattussaanissamilluunniit siooarasaarneqarsinnaalluni. Aamma imaassinnaavoq meeqqap angajoqqaavisa meerartik naakkinarsartaraat nikanarsartarlugulu. Assersuutigalugu meeraq oqarfigisinnaavaat naleqanngitsuusoq, kissaatigineqanngitsoq asaneqanngitsorluunniit.

Kinguaasiutitigut persuttaaneq/kinguasasiutitigut atornerluineq
Kinguaasiutitigut atornerluineq pisarpoq inersimasup ukiukinneq pinngitsaalillugu kujanneqataalersikkuniuk.