Ilisarnaatit kalerriutillu

Ilisarnaatit kalerriutillu suut arajutsinaveersaassavigit?
Inersimasutut tamatigut piareersimassaagut meeqqani ilisarnaatinik takunninnissamut naalaarnissamullu. Iliuuseqarnissamut annermik patsisissaqarsinnaavoq meeqqat pissusilersornertik tassanngaannaq allanngortipassuk imaluunniit nikallunganartumik ilisarnaatit kalerriutillu ataatsikkut takkukkaangata.

Ilisarnaatit kalerriutillu takutittarpaat meeraq inuunerissaartuunngitsoq immaqalu persuttarneqartarsimasoq:

  • Timikkut ilisarnaatit soorlu tilluusarnerit assigisaalu.
  • Kamanneq aamma patsisissaqarunanngitsumik kamarujussuartarnerit
  • Nukersorneq aamma aaqqiagiinnginnermik qaangiiniarsinnaannginneq 
  • Napparsimakulanerujussuaq
  • Angerlarnissamut annilaanganeq – angerlarsimaffimmilluunnit qimaaneq 
  • Imminut matoqqasuuneq pasinnikkajussuserlu
  • Inersimasunit qimaaniartutut akuersaanngitsutullu pissusilersorneq
  • ikinngutinut pinnguaqatinullu qalliinnarsortumik attaveqarneq
  • Timikkut malunnaatit soorlu naarlunneq, niaqunnguneq il.il.
  • Eqqissiveqanngitsumik annilaangarpasissumillu pissusilersorneq

Pingaartuuvoq erseqqissassallugu meeqqap persuttarneqarsimaneranik qularnaatsumik tamatigut ilisarnaateqartanngimmat. Ilisarnaatit kalerriutillu taaneqartut takussutissaasanngillat meeqqap persuttarneqarsimaneranut.

Meeqqat kanngusuutigigajuttarpaat persuttarneqarsimanertik taamaattumillu toqqorterniartarlugu. Ilaasa soqutiginngitsuusaartarpaat takussutissartaqaratillu. Ilisarnaatit kalerriutillu uppernarsaataanngillat persuttaasoqarsimanermik – tamatigulli tikinneqartariaqartarpoq ilisimasalittut pisup eqqarsaatigilluarnissaanut iliuuseqarnissannullu periarfissat eqqarsaatigilluartarnissaat.

Ilisarnaatit kalerriutillu saniatigut toqqaannartumik meeqqamut persuttaanermut isiginnittuusinnaavutit. Tamatumani arajutsinaveersaassavat qanoq pisoqarnera aamma persuttaaneq unitsinniarsarissavat, kommuni attaveqarfigissavat, aamma pisuni ingasappallaani politiit attaveqarfigissavatit. Meeqqat persuttarneqarsimasut minnerpaamik inersimasoq ataaseq pisariaqartippaat tusarnaartussatut persuttaanerullu unitsinneqarnissaanik isumaginnittussaasutut.