MIO

MIO
Meeqqat illersuisuat, meeqqat pillugit siunnersuisoqatigiit aamma meeqqat pisinnaatitasaffii pillugit suliffeqarfik pilersinneqarput 2012-mi Meeqqat illersuisuat aamma Meeqqat pillugit Siunnersuisoqatigiit pillugit Inatsisartut inatsisaat nr. 11 22. november 2011-meersoq aqqutigalugu.

Meeqqat illersuisuata qulakkiissavaa siuarsassallugillu inuiaqatigiinni meeqqat inuusuttullu soqutigisaat Naalagaaffiit peqatigiit meeqqat pillugit isumaqatigiissutaat aallaavigalugu. Meeqqat illersuisuata ilaatigut pisortat namminersortullu suliffiinik siunnersuillunilu ilitsersuisinnaavoq.

Meeqqat illersuisuat suliani ataasiakkaani aalajangiisinnaanngilaq, oqaaseqarsinnaavorli aamma pisortat namminersortullu suliffeqarfiini meeqqanut atugassarititaasunik paasissutissarsisinnaasoq.

Meeqqat pillugit siunnersuisoqatigiit arfinilinnik ilaasortaqarput aamma Meeqqat illersuisuat siulittaasuuvoq. Meeqqat pillugit siunnersuisoqatigiit ukiuni pingasuni atuuttassapput, inuttaqartassalunilu suliamut aalajangersimasunik ilisimasalinnik pingasunik, taakkulu paasisimasaqassapput meeqqat ineriartornerannik, atuartuunerannik, piorsarsimassusaannik sunngiffiinillu, peqqissusiannik, inatsisitigut inissimanerannik meeqqanillu immikkut pisariaqartitsisunik. Siunnersuisoqatigiit Naalakersuisunit toqqarneqartarput kiisalu pingasunik sinniisuutitaqarput NGO-niit namminersortunillu suliffeqarfinnit. 

MIO pillugu atuagassat allat uani