2014-2017-mut annersaasarneq akiorniarlugu iliuusissat

Inatsisartut 2013-imi ukiukkut katersuunnerminni persuttaasarneq akiorniarlugu siumut isigaluni periusissiaq iliuusissatullu pilersaarut ukiuni 2014-2017-imi piviusunngortinneqartussaq akuersissutigivaat.

Anguniagaq tassaavoq persuttaasarnermik ajornartorsiuteqarneq suliniutini tamani inuiaqatigiinni atugarissaalersitsinissamik, peqqissuunissamik inuuniarnermilu akuutitsinissamik aaqqissuussanut ilanngullugu eqqarsaatigineqartassasoq.

Iliuusissatut pilersaarummi suliniutissat anguniakkanut atuuttussanut sisamanut sammitinneqarput:

  1. Persuttaasarnermik eqqugaasut pitsaanerusumik ikorfartorneqarlutillu siunnersorneqartassapput.
  2. Persuttaasarnerup kaajalukaartua kipitinneqassaaq - ilaatigut persuttaasartunut katsorsarneqarnissamik neqeroorutinik pilersitsinikkut.
  3. Susassaqarfiit akimorlugit persuttaasarnermut tunngatillugu suliat suleqatigiissutigineqarnerat ineriartortinneqassaaq.
  4. Persuttaasarnermik ajornartorsiuteqarneq pillugu ilisimasat paasissutissiisarnerlu annertusarneqassapput.

Suliniuteqarfigisassat
Suliniuteqarfigisassaq 1-imi persuttaasarnermik eqqugaasut pitsaanerusumik tapersersorneqartarnissaat qitiutinneqarpoq.  Anguniagaq tassaavoq persuttaasarnermik eqqugaasut inuunermik persuttaanertaqanngitsumik pilersitsinissamut siunnersorneqarnissaannut tapersersorneqarnissaannullu periarfissanik pitsaanerusunik qulakkeerisoqassasoq.

Suliniuteqarfigisassaq 2-mi persuttaasartoq qitiutinneqarpoq. Anguniagaq tassaavoq persuttaasarneq pinaveersaartinneqassasoq persuttaasartup pissusilersuutimigut nutaamik pilersitsineratigut.

Suliniuteqarfigisassaq 3-mi sulisut kajumissutsiminillu peqataasut persuttaasarnerup killilersimaartinneqarnissaanik pinaveersaartinneqarnissaanillu suliallit qitiutinneqarput. Anguniagaq tassaavoq ilaqutariinnut persuttaasarfiusunut atatillugu siusinaartumik siunertaqartumillu suliniuteqarneq qulakkeerniarlugu susassaqarfiit akimorlugit suleqatigiinneq annertusarneqassasoq.

Suliniuteqarfigisassaq 4-mi persuttaasarneq pillugu ilisimasat paasissutissiisarnerullu annertusarneqarnissaat qitiutinneqarpoq. Anguniagaq tassaavoq ilaatigut ilisimasanik tunngaveqarnerusumik suliniummik ineriartortitsinissaq persuttaasarnermillu isiginnittaatsimik allanngortitsinissaq aamma isumaginnittoqarfinni pisortanilu paquminarsinnaasunik kipititsinissaq.

Suliniuteqarfigisassat sisamat taakku ataanni suliniutigisassat 32-t oqaasertalersugaapput, taakkulu suliniutigisassat nutaajunngikkunik suliniutaareerput ingerlateqqinneqartussat.