Oqaluttuat

"Aassunni sukkut tamaana takornartarinagu naamavara, tipilu aliannaanngilaq. Igalaamerngit natermut siammarterlutik tunneri siutinnut annernarput, anaanallu naalliunnera ersarippoq. Aqqalussamali timera tamaat eqillugu qianera uummatinnut kapinarnerpaavoq..."

Uani oqaluttualiat marluk qanigisani timikkut tarnikkullu persuttaasarnermut tunngavillit atuarsinnaavatit. Oqaluttualiat atuakkameersuupput "Inuusuttut - nunatsinni nunarsuarmilu" oqaluttualianik katersanik imaqalimmik.

"Tupakkaluarpunga taannali ajornerunngilaq, susinnaanngitsutut misigineq, meeraagaluarluni meeraanngitsutut misigineq, akerlianilli aamma inersimasuunngitsutut misigineq, misigissutsit sumiitissanerlugit nalornineq, taakkua immaqa tupannarnerungaarput. Anaanannullu ersineq ajugaajuaannarpoq..."

Oqaluttualiat Rosine Kreutzmannimit 19-inik ukiulinnik aammalu Sørine Steenholdtimit 26-nik ukiulinnit allanneqarsimapput, taakkulu tarnip pissusaanik ilisimasalimmik nassuiaasersortalerneqarsimasut uani atuangassianngortinneqarsimapput. Qanigisani persuttaasarneq, persuttaasarnerup ingerlaannalersarnera kiisalu inooqataanermi kingornussassat tujorminartut pillugit suleqatitillu oqaluuserinissaannut oqaluttualiat assersuutitut aallaavigisinnaavasi.

Qaamaneq inummiittoq, Rosine Kreutzmannimit

Anaanavit oqaasii naalattassavatit, Sørine Steenholdtimit