Qimalerneq

Qimalerneq 
Annersarneqarsimasup taamatut pineqartarnini akuerisinnaajunnaarpagu illit sullissisutut ikiuinissat, anniaataanik katsorsarneqarnissaa immaqalu politiinut suliassanngortitsinissaq pillugit pisariaqarsimappat ikiussavat.

Aalajangiussimappagu taamatut pineqartarnini naamagilersimallugu, taava tamatumani aappaminik qimatsinissaa ilimanaateqarluarsinnaasarpoq. Tamanna ajornaatsuinnaaneq ajorpoq. Taamaattumik taamatut aalajangertoqareernerata kinguninngua iliuutsit pingaaruteqartorujussuupput, ingammik pinngitsoortikkumagaanni ajornartorsiutit aaqqiissuteqarfiginnginnerini aappakuminut uteqqissinnaanissaa.

Atuaruk: Sooq aniinnartanngillat?

Ajortumik pineqarsimasup piffissaq taamatut pineqareernermi kinguninngua nuanniinnerpaatut nalilissavaa:

  • Amerlasuutigut anniartitsinerit sakkortuneruleriartuinnarsimasarput, tassami annersaasoq aamma aliasuttarami, iliuusissaaruttarami aammalu/imaluunniit imminut aqussinnaajunnaaqqasarami.
  • Annersarneqartarsimasut anniartinneqarnerup nalaani toqqorsimaaqqarajuttarput. Tamatumunnga pissutaasinnaapput kanngusunneq aapparisalluunnit sangiaqqanera. Taamaattumik attaveqaatigisartakkani ikilisoorsimasinnaasarpai taamaattumillu pissutsit allanngorujussuarneranni paaqqutarineqarnissani angujuminaatsilertarlugu.

Taamaattumik pingaaruteqarpoq, anniartinneqarsimasumik tapersersuinissat, taasumap anniartitsiffiunngitsumut qimaaniarnerani.

Qimattoqartillugu sillimaniarnissat
Annersaasarsimasoq qimanneqareernermi kingunitsianngua ulorianarnerpaarajuttarpoq, tassami annaasaqareerluni annaasassaaruteqqagami.

Taamaattumillu pisariaqarsinnaavoq sillimaniarnissaq siunertaralugu upalungaarsimanissaq:

  • Politiit ikiortigalugit najugaqarfimmut qanillisinnaajunnaarnissaa sulissutigineqarsinnaavoq
  • Meeqqat ulorianartorsiortinneqarnersut kommunip nalilersuiffigisussaavaa arlaatigullu ikiorsiissuteqarluni.
  • Imaassinnaavoq annersarneqartarsimasoq aapparisimasaminut toqqoqqagallartariaqartoq.

Siunnersuineq katsorsaanerlu

Anniartinneqartarsimasup aamma pisariaqartissinnaavaa:

  • Nakorsamit isumagineqarnissani
  • Meeqqani imminullu tunngasutigut ikiorserneqartariaqarluni
  • Angajoqqaatut akisussaaffik, takunnissinnaatitaannissaat, averusinngikkaluarluni avipallassinnaaneq pillugu inatsisitigut ikiorserneqarneqarnissaminut.

Annersaasoqarsimaneranut uppernarsaatit
Kingusinnerusukkut annersaasarsimasup meeqqaminik takunnittarsinnaanissaanut, avinniarnermut imaluunniit pineqaatissiiniarnernut, annersaasimanerup takussutissaqartinneqarnissaa pingaaruteqarput.

Uppernarsaatissat assersuutigalugu ukunannga pissarsiarineqarsinnaapput:

  • Nakorsamit, peqqissaanikkut sulisumit, nakorsiartarfimmit
  • Politiinit, politiit ilaqutariit akuleruffigisariaqarsimappagit
  • Qimarnguimmit
  • Takunnissimasup oqaaserisaannik
  • Qarasaasiakkut allakkat, sms-it il.il., soorlu aapparisimasaq qunusaarisarsimappat.

Annersaasimaneq pillugu unnerluutiginninneq
Annersitsineq pineqaatissiissutigineqarsinnavoq. Annersitsisimasoq politiinut tunniunneqarsinnaavoq ajortumik pineqarsimasumit, takunnissimasumit imaluunniit sullissisumit.

Politiit nammineq naliliinertik toqqammavigalugu suliassaq misissuiffigisinnaavaat ilimanaateqarpat ilaqutariit iluanni annersaasoqartarsimasoq.