Neqeroorutissat suuppat?

MIO'p SMS-ikkut siunnersuisarneri 1899
MIO’p SMS-ikkut siunnersuisarneri akeqanngillat, nuna tamakkerlugu meeqqanut inuusuttunullu SMS-ikkut attaveqarfissaq, tassanilu inersimasumik siunnersuisinnaasumik allaqateqartoqarsinnaavoq. Ammasarfiit: Ataasinngornermiit – tallimanngornermut 16:00 – 18:00

Neqeroorutissat suuppat?
Ataatigut allaqqapput sullissinut paasiniaaffigissallugit periarfissat assigiinngitsut. Pingaaruteqarpoq naqissusiivigissallugu oqarasuaatitigut periarfissat ulluinnarni ilinniarsimasunik sulissunneqarnerminngaanniit taartaasinnaanngitsut, soorlu ilaqutariinnut sullissiviit imaluunniit soorlu ilinniartitsisoq uummaarilluartoq. 

134 – Meeqqanut Inuusuttunullu attaveqarfik
Oqarasuuatikkut attaviit taarsersinnaanngilaat sullissisutut ilinniarsimasimasumik meeqqat inuusuttuaqqallu tatigisaannit toqqaannartumik sulissunneqarneq. Kisiannili tapitartuutitut pissusissamisoorpoq meeqqat inuusuttuaqqallu ilisimatissallugit, Meeqqanut Inuusuttuaqqanullu oqarasuaat aqqutigalugu ullut tamaasa nal. 19.00 – 21.00 tassunga akeqanngitsumik sianersinnaammata. 

Ilaqutariinnut ilisaritinngikkaluarluni sianerfissaq: 31 41 51
Tassunga sianerneq sinerissamit tamarmit akeqanngilaq. Ilaqutariinnut siunnersuisarfik ilaqutariinnut meerartalinnut perorsaaniarnermilu nalornissuteqartunut naatsorsuussaavoq. Ammasarfii: Sapaatip akunnera tamaat nal. 19.00-miit – 21.00-mut

Attavik 146
Nuna tamakkerlugu atuuttoq, kinaassutsimik oqaatsiginninngikkaluarluni inuttut ajornartorsiuteqartunit imminoorsimasunillu qanigisalinnit sianerfigineqarsinnaasoq. Ammasarfii: Sapaatip akunnera tamaat nal. 19.00-miit – 21.00-mut

Tusaannga 54 67 54 
Ilulissani inuusuttunut oqarasuaatikkut siunnersuisarfik. Ammasarfia: ulluinnarni nal. 16.00 – 08.00; weekend-ini tallimanngornermi nal. 16.00-miit ataasinngornermi 08.00-p tungaanut.

Ilinniartunik Siunnersuisoqarfik
Nunatsinni Ilinniagaqartut inuttut ajornartorsiuteqarsimagunik ilinniarfimminni siunnersortimut saaffiginnississuteqarsinnaapput. Taassumap ilinniagaqartoq Ilinniagaqartut Siunnersuisarfiannut ingerlateqqissinnaavai. Immersugassaq ilinniagaqartumit immersorneqaqqaartarpoq, taannalu siunnersuisup ataqatigiissaarisumut nassiuttarlugu. Ataqatigiissaarisup ilinniagaqartup aammalu tarnip nakorsaata suleqatigiinnissaat aqqutissiuuttarpaa.

Ilinniartunik siunnersuisarfik Ilisimatusarfimmit akisussaaffigineqarpoq, tassanngaanniillu nunatsinni ilinniagaqartut tamarmik kiffartuunneqarsinnaallutik. Ilinniagaqartut taamatut innersuunneqarsimasut katillugit arfineq-pingasoriarlutik tarnip nakorsaanik akeqanngitsumik oqaloqatiginnissinnaasarput.

IKIU –Inatsisitigut Ikiorsiisarfik
Arlaatigut ilaqutariit iluanni anniartitsisoqarsimatillugu taakkua arlaat inatsisitigut apeqqutissani pillugit IKIU-mut saaffiginnissuteqarsinnaavoq. IKIU-p isertortumik akeqanngitsumillu siunnersuinissaq ingerlattarpaa, tamatumanilu aalajangiisuuginnarluni akeqanngitsumik ikiorserneqarnissamut periarfissat Eqqartuussisarnermut Inatsimmi § 254, imm. 3 toqqammavigalugu naamassineqarsimanersut. Siunnersuisut tassaapput inatsisilerituut piumassutsiminnik sulisut. Taakkua ulluinnarni pisortat suliffeqarfiini namminersorlutillu ingerlatsiveqarfinni sulisuusarput.

Oqarasuaatikkut saaffiginniffissaq: Ataasinngornermiit tallimanngornermut nal. 09.00 – 16.00, oqarasuaat 32 45 48 aqqutigalugu.

Nuummi qimarnguik - Oqarasuaat ammaannartoq

Nuummi qimarnguik ammaannartumik oqarasuaatitaarpoq arnat tamarmik sianerfigisinnaasaannik sapaatip akunnerisa ulluini tamani

Tlf. 55 46 47